मुख्य समाचार

सरकारी अस्पतालका उपकरण बिगार्ने र क्लिनिक देखाउनेलाई कारबाही हुन्छ : स्वास्थ्यमन्त्री यादव


काठमाडौं-

उपप्रधान तथा स्वास्थ्यमन्त्री उपेन्द्र यादवले सरकारी अस्पताल तथा स्वास्थ्य संस्थाको अवस्था सुधारमा आफू लाग्ने बताएका छन्।

राजधनीमा आयोजित एक कार्यक्रममा मन्त्री यादवले सरकारी अस्पतालका डाक्टर तथा प्राविधिकले नै उपकरण विग्रेको छ भन्दै निजी संस्थातिर पठाउने गरेको गुनासो आइरहेको बताए।

‘यो विषयमा म बुझिरहेको छु,’ उनले भने, ‘अस्पतालकै प्राविधिक जनशक्ति उपकरण विगार्ने र निजीबाट कमिसन लिने गरिरहेका छन्। अब हामी यसमा काम गर्छौ र दोषीलाई सजाय दिन्छौं।’

उनले सरकारी अस्पतालकै कर्मचारीले आफ्नो अस्पतालको उपकरण राम्रो छैन, नविग्रे पनि विग्रेको छ भन्ने, जानाजान उपकरण विगार्ने गरेको लगायतका गुनासा आफूसँग आएको बताए।

‘सरकारी अस्पतालमा उपकरण ल्याउने समयमा आधुनिक र उच्चप्रविधिको खरिद हुन्छ,’ उनले भने, ‘तर त्यसको प्रयोग भएको ४÷५ दिनमा विग्रेको हुन्छ। यो कुरामा हामी छानविन गर्छौँ।’ 

उनले स्वास्थ्य क्षेत्रमा ठूलो परिवर्तन जरुरत रहेको भन्दै आफूले अहिले स्वास्थ्य क्षेत्रका विकृती र विसंगतिका विषयमा मात्र सुनिरहेको जानकारी दिए। 

‘मैले मन्त्रालयको जिम्मेवारी सम्हालेदेखि विकृति, विसंगति, मनपरी, लापरबाहीका विषयमा मात्र जानकारी लिइरहेको छु र सुनिरहेको छु,’ उनले भने, ‘सबै कुरा सुनेपछि म निश्चित योजना बनाएर सबै विकृती र विसंगतिको अन्त्य हुने गरी काम अगाडि बढाउँछु।’

उनले सरकारी स्वास्थ्य संस्थामा उपकरण थन्किने अवस्थाको अन्त्य गर्नतर्फ पनि आफू लागि पर्ने जानकारी दिए।
 

प्रतिकृया दिनुहोस

प्राप्त प्रतिकृयाहरू

यसमा तपाइको मत



पढ्नै पर्ने